Pípulagningamenn leggja og tengja hita-, neysluvatns- og frárennsliskerfi. Í starfinu felst einnig að setja upp ýmis konar sérhæfð lagnakerfi og sjá um viðhald og endurnýjun slíkra kerfa. Pípulagnir er lögvernduð iðngrein.

Í starfi pípara gætirðu starfað hjá pípulagningameisturum, í orkufyrirtækjum, veitustofnunum eða við faglega ráðgjöf í tengslum við fagið. Pípulagningamenn vinna oft með hönnuðum lagnakerfa og öðrum iðnaðarmönnum.

Helstu verkefni

- leggja vatnshita- og neysluvatnskerfi innanhúss
- setja upp stjórnbúnað fyrir hitakerfi, þrýstiprófa, stilla og gangsetja
- setja upp og tengja hreinlætis- og heimilistæki
- tengja lagnakerfi við veitukerfi
- leggja snjóbræðslu-, vatnsúða, eldvarnar- og hitakerfi á viðeigandi staði
- setja upp frystitæki í iðnfyrirtækjum og annast vatnslagnir í skipum
- veita ráðgjöf um efnisval og tæknilegar lausnir

Hæfnikröfur

Pípulagningamaður þarf að vera fær um að hanna og leggja hita-, vatns- og frárennsliskerfi, teikna upp deililausnir og frágang og annast viðhald og viðgerðir.

Í starfi pípulagningamanns eru notuð ýmis verkfæri og vélar sem mikilvægt er að þekkja, svo sem rörtangir, lyklar, sagir, snitt-, bor-, brot- og höggvélar. Einnig eru notuð rör af ýmsum stærðum og gerðum ásamt tengibúnaði og einangrunar- og þéttiefnum.

Félag pípulagningameistara

Námið

Pípulagnir eru kenndar við Tækniskólann, Borgarholtsskóla og Verkmenntaskólann á Akureyri. Meðalnámstími er fjögur ár, þrjár til fjórar annir í skóla auk starfsþjálfunar. 

Raunfærnimat hefur farið fram og/eða kann að vera í boði.

Ekki fyrir þig?

Skoðaðu aðra valmöguleika